☆南瓜吐司☆―冷藏法

☆南瓜吐司☆―冷藏法

再戰吐司，嚟個係病之前做的，所以大家唔好以為我病都咁努力，實際我真係病到瞓咗两日，一食藥無耐就眼瞓到頭暈，唔想瞓都要你瞓，食藥食咗两日，足足瞓咗两日，真係好耐無嘗試過咁啦！通常放假都會在家返轉個廚房，但今次就瞓咗响張牀，無得玩。

而家重有小小頭暈及頭痛，還有两日抗生素未食完，真係好病呀今次！

上週特登走到banking warehouse買了3kg高筋麵粉，把心一横，每次做包都好快用晒，今次買多d，可以慢慢用呀！重有本免費食譜取添。

溫馨提示：

因南瓜泥有水份，可能搓麵糰時要加小許高筋麵粉，令到麵糰無咁濕。

出來的效果不是太軟身，無咩南瓜味道。

材料：

A.

高筋麵粉                300g

砂糖                        6g

乾酵母                    6g

水                            195g

~~~~~~~~~~~~~~~~~~~

B.

鹽                            6g

冷卻的南瓜泥        150g

~~~~~~~~~~~~~~~~~~~

C.

無鹽牛油                15g

芝士絲                    小許

 

步驟：

1.      將A用麵包機搓混，放入雪櫃一晚；

2.      拿出A麵糰放回室溫，排氣及分割滾圓，中間發酵20-30分；

3.      再加入B及C；成型，最後發酵60分鐘，放上芝士絲；

4.      焙爐200度焙30-35分鐘，出爐，脫模冷卻。

 

 食譜：曾美子教你第一次做麵包

放假先呢病！！？？！！

放假先呢病！！？？！！

原先約定8週年結婚紀念日去街街，誰知自己又病倒了，是感冒的初期，成身酸痛，頭重重，喉嚨好痛，看了醫生希望好啲，但又勁眼瞓，回到公司，老細話不如你返家休息啦！休息？心諗，下午我都請了假去街街呀！都好，早啲出街玩下，但都回了家取點東西及瞓了半小時，子曦爸相約了舊同事食飯，而我亦一齊食，但因瞓了半小時而遲到了。

去街時，真係勁眼訓，一點精神都無，提不起勁享受今天的假期，一坐下就好想瞓，所以今天只去了“朝日”換了點東西，竟然比我遇到catfood喎！她幫我買咗麵包模呀，好開心。之後去了個朋友賣批發的店鋪，她送了個飛機袋比子曦，哈……哈……都幾可愛架！之後又到深水埗想買一啲盒，用來放迷你玩具那些展示盒，但唔係間間有，而且都唔平，重要用批發買，一買又買好多，比起灣仔重小重貴呀！無買嘢就走了。

後到我們想到又一城食返個下午茶，一坐下就勁眼瞓，坐了不足一小時，就話不如返家啦！真係好眼瞓呀！而且子曦又未好返，諗都要再看多一次醫生啦！果然眼仔真係有小小發炎，還有小小鼻水，小小咳，看多一次清下尾啦！但今次就食西藥啦！

十月生日blog聚於「蠍」家

自八月生日blog聚後都沒有機會再參加“蠍”的生日blog聚了，但她沒有放棄再找我出席她的的生日會，今次是“蠍”的生日月，又點可以唔出席呢？雖然都好忙碌，又要照顧近日成日病的子曦，性情難卻，今次都要抽時間出席的。

放工不久，在買緊禮物之際，收到以為“蠍”打來吹我要到，我心想，我一早講咗5時左右才到逹，但她(扮亞蠍的)卻話人齊啦！等我咋！心想，唔係掛，咁快，唯有好趕的比錢，搭巴士，連東西都不買了，就坐的士到她家，誰知？？？？只有5個人，實際出席是15人，我話唔係到齊嗎？心知被人整古了，心好，不用花錢買食物，整古我嗎？無好嘢你食，哈……哈……

不過就因為早咁多到，有啲肚餓，所以先食為主，食了streetcat的一串魚蛋呀！好好味！

今次好多blog友都未見過，只見過幾位，她們個個都有整嘢食，除了我，因無咩時間預備，唯有两手空空，只帶了生日禮物，今次的食物好豐富，多到都唔知邊個打邊個啦！但從“蠍”的blog就可以一一看到。真係多謝“蠍”的提示呀！

但最想見到而又無想過會見真係見到的鳯梨卷，是catfood的出品，真係好啦！未整先有得食，未食先聞到香味，而且亦有她教路的食譜呀！今次重唔整返夠本。

第二次見咁大班blog友，而且重去blog友的家，真有d特別，見到其他blog友都好多嘢講，有時會感到好陌生，又好似好熟，友情真係要好多時間去陪養的。

而自己因要先回家，所以9時半就要走，本想只一個人走，誰知“丁屎”的男友駕車話送我哋，咁就好似引動了她們解散咁，真不好意思了。

回家同子曦爸開，話有幾位男士都玩單反機，子曦爸話「早知我都去啦！大家講下機都好呀！」下次……下次……

子曦受傷記

上两星期，帶子曦返學時，一不小心擦傷了子曦的腳，第一時間當然有點痛，但都無咩事，但回家一洗白白時就知道好痛，子曦講：「好痛呀！受傷啦！」，立即哭出來，又要媽媽抱，又要媽媽錫，我話：「不如貼膠布好嗎？」，「呼…呼…好呀！」點知貼完一張又再貼一張，一貼就貼咗5張呀！重唔比我吔動添，要等他睡着先可以除下呀！

真係好好笑呀！笑c人啦！小朋友真係好天真，好可愛呀！

子曦前日又發作啦，又係两行大鼻涕蟲，重好黃好綠添，病好都無二星期，又要看中醫啦！食了两日藥，點知眼仔有好多污垢，好似將鼻涕放咗响對眼度咁，因為從未見過，子曦爸還以為子曦擦鼻涕時擦了在眼仔上，我話有無咁嚴重呀！咁都擦得上去，後來看他對眼又真係好快又有眼垢，看真些，一定唔係擦上去的，而且重有啲紅腫及水腫，一定有事的。

回到教會，問下啲有經驗的媽媽，原來子曦好熱氣呀！有咁多眼垢，要煲多啲竹庶水給他飲呀！所以翁太就在涼茶店買了支菊花茶給子曦，唔該晒呀！e……想真啲，自從沒有在奶奶家，由嫂嫂接放學，回家雖然有湯水，但真係無咩煲呢啲清熱飲品呀！做媽媽真係一啲都唔簡單呀！突然好掛住奶奶添！

開完會就到子曦表姊接回子曦，再看多一次中醫，同中醫講，咁多眼垢一定係熱氣啦！又要食多两日藥啦！