两小時行了香港九龍

繼130907培媽媽覆完診，本來約了Icy去我家做蛋糕，因她有個朋友生日，所以順便約她行下Three sixty ，過得海當然要行下，看看有咩特別的東西可買，但因未食嘢，便與Icy食下嘢先，我們選擇了Three sixty的Food court，免行來行去呀！用$125食了個pizza及意粉。

再行下Three sixty，後來被我發現好想買好耐的呢支嘢，上次去時找唔到，亦可能無貨，但今次有呀！當然要買啦！原來有大同細支，大的要$114，細的$65呀！有59ml，都可以接受啦！所以就買了回家，但其實我還有香蘭子種籽及香蘭子未用完呀！哈…哈…都係人有我有呀！(Angel 我終於買到啦！哈…哈…哈…)

後來Icy決定唔做蛋糕啦！不如行下街算啦！嘩……好呀！我都唔係好想做呀！子曦在家，奶奶在家，鐘點又在家，如果重開工做蛋糕，都唔知幾時先收得工呀！後來再決定去尖沙咀citysuper行多一會，買了一包胚芽，原來小麥胚芽都有得買喎！又唔係太貴，重分有機同無機添！買包有機小麥胚芽先，用來做蛋糕、曲奇、或飲品時放d入去都好呀！成日見人家叫胚芽奶茶，自家做下胚芽豆漿、胚芽好立克都幾好呀！其實都係買來玩下咋……多謝$23.5呀！

媽媽重見光明呀!!!!!

星期三放了假，為的是與媽媽覆診，因前一天做了白內障手術，第二天要回診所；但發現子曦昨天病的情況加劇，還有發燒，雖然已再看醫生取定發燒藥，以為退燒可以上學，誰知第二天早上都仍然發燒，持續發燒的情況雖然不高，燒下、退下，都係同子曦請定病假了，免子曦的病傳給小朋友，亦想他在家休息，但因要外出同媽媽覆診，唯有請奶奶早一點來我家看顧着他，煲粥仔食啦！呢個人仔，本想他好好休息，點知在家都唔停，發燒都玩到跳來跳去，無時停。

 

下午外出到中環診所會合媽媽及爸爸，因細路早到，所以他們先上診所，一見面，姑娘已經為媽媽拆除眼的綿花及洗下隻眼，視力開始回復了，而且還比以前好呀！經再次驗眼，醫生檢查，以前視力是1，現在就已經有10了，醫生還同媽媽講笑，你現在隻眼好靚喎！我媽媽話：好靚嗎？真係好好笑，其實這個醫生都幾靚仔架，(靚仔)係呀！年齡不是太大，而且留有「布老徒」的鬍子，好有藝術家的外形，哈…哈…講真話咋，唔係咩呀吓！

 

回想起媽媽第一隻眼有白內障時，時常在家跌倒，但以她的性格，有事自己處理，不同人講，就算講了給爸爸聽，爸爸都以為他講笑，後來我們發現她時時講隻眼看不到，以為老花，還為她配眼鏡，但後來配鏡的師父講唔係老花咁簡單，不如你去專業眼科醫生檢查下，後來才發現是白內障，但都已經太遲了，已經壞死了，沒有得醫了，後來我們就好緊張她另一隻眼，原來都已經有白內障了，但在政府醫院要等足成年幾才可以更換，等得離都又壞死啦！而且媽媽雙眼看不到嘢，她都好唔方便，成日黑漆漆，她一定好懼恐的，所以妹妹及大家都決定幫她找私家做手術了，幸好還可以更換，當初還以為好貴，原來比想像中平，只是$12,000就可以了，媽媽重見天日，作為女兒的我們都好開心，最開心的就是爸爸呀！還叫我影底診所牆上由病人送給醫生的謝卡，原來重見天日是多麼的好呀！幾多人寄謝卡給各醫呀！

 

 

不過細路就不太幸運，由1：30等到4時，還比警察抄咗牌，$450當比的士錢啦！而本來想與他返入娘家，因怕眼看不到，但現在不用了，他們好叻，由細路護送就可以了。

 

亦突然想，原來咁多女兒都幾好，如果家人有事，每人出一份力都已經足夠了，如果出十份力咪好勁？誰得閒就由誰幫忙，誰有錢就由誰付出，哈…哈…幾正喎。想起自己第時老了，點呢？只有一個仔，他咪好辛苦？係咪要為未來打算下呢？

 

 

☆有機黑麻豆乳甸丁☆

☆有機黑麻豆乳甸丁☆

想做一個芝麻味的奶凍，但家中又沒有白芝麻，所以放工去一去有機店看看有沒有白芝麻粒賣啦？誰知連黑芝麻都沒有，因時時都去，店主都認得我，我便問她，有沒有白芝麻呢？她說：沒有呀！連黑芝麻粉都賣晒了！咁好賣！但她走入貨倉，拿了一包細細的白芝麻出來，是否想要呢種呢？只有一包！係呀！係呀！想要呀！幾多錢呀！唉……送比你啦！吓……送……唔係幾好呀！唔緊要！送比你啦！多謝晒呀！

其實已經走了出門口，但想想，亦見到有四季豆，回頭就用$16買了包四季豆呀！係咪為咗包芝麻，都要買d嘢？都唔係架！因子曦都好喜歡四季豆，所以都會買架……哈……哈。

但回到家中，原來想起我都有包早前在她處買的黑芝麻粉，今次就做呢個啦！但又諗起，早前做了豆漿，不如就來一個☆有機黑麻豆乳甸丁☆啦！

好滑！都有黑芝麻味！因忌廉沒有打起，食落都幾煙勒！

 

老闆送的白芝麻

分量2杯

材料：

黑芝麻粉        25g

豆漿                150g

白砂糖            15g

魚膠粉            1茶匙

忌廉                90g(不用打起)

步驟：

1.      魚膠粉加入小許豆漿(3湯匙)，攪拌後坐熱水坐溶；

2.      其他豆漿煮沸，加入黑芝麻粉煮1分鐘後加蓋焙3-5分鐘；

3.      過瀘黑芝麻豆漿後加入砂糖再煮一下；

4.      放入魚膠豆漿水後坐冰涼後加入忌廉放入雪櫃凝固。

 

如果太大粒可用攪拌機攪碎

 

親子樂飲食篇

入得沙田，又點會唔去citysuper，亦選購了已聞名遠播的“博多屋”豆腐及豆漿呀！其實豆腐之前都買來食過，因實在太滑啦！今次都買了一磚($8.5細)來做蛋糕，而豆漿真的是第一次嘗試，聽人講，好有豆味，亦是沒有任何添加，所以令次用$12都買來飲下，亦買了一包豆豆，見$10一包又唔係太貴，買有機豆都要成$15-20，亦想看看自製又做唔做到咁有豆味先。本來想留返d樽豆漿回家做甜品，但因在公園玩得好熱，都忍唔住，一家人瓜分了一支咁細又小的豆漿呀！我同老公都慢慢品嚐“博多屋”豆漿究竟又幾好味，嘩！真係好有豆味，好濃，與平時飲的濃好多，點解呢？會否水與豆的比例有關呢？

這個是什麼？見都下午茶時間，看見citysuper出面有間麵包店，人流好多，亦想食下包包，子曦亦肚仔餓了，就買了幾款，而這款有d似糯米池的東西，原來叫做朱古力冬甩，食落好煙韌，個心原來係軟朱古力呀！$6一粒都底食，但老公就話咁貴，又細又唔底食喎！我個人覺得，人一世物一世，咩都要嘗試下，又唔係太貴呀！$6皮我都比得起呀！哈….哈….不過我都買咗2粒呀！

又見過好耐，聽過好耐，但就真係未食過的Ms. Fields英式曲奇，成日覺得自家都有出品，咁貴買來食，係咪真係咁好食呀！好！一於用$28.5買了三塊來嘗試，真係好唔同呀！食落好煙韌，有點鬆，老公話好似琳咗，但我話唔係，而是鬆得來有d煙韌，點解會做到咁煙韌呢？點解呢？

 

晚上，到又一城rice paper食了個晚餐，第一次食，餐紙又幾靚喎！是泰式餐廳，但食物就唔係太多選擇，雖然都幾好味，但送餐送得太快，快到好似食快餐咁！不過子曦成日坐唔定，食快d都好，可以快d走，免他騷擾食客呀！3款，多謝$270。而我同老公都覺得九龍灣個間“心。泰”好好多，同樣都係美心集團呀！“心。泰”就多好多選舉，而且唔會好似快餐咁，而且價錢重平小小添。真係同一食物，放在不同地點都有咁大分別呀！當然價錢、格局同食客都好唔同呀！

牛油果軟瞉蟹米卷

生熟牛肉湯河

鮮蝦雞絲抄飯

還有，去時想去呢間超市看看有什麼嘢好買，有就買小小，在門口見到有中秋節的禮品包裝，見到呢個西瓜包後咁靚，走前看看，嘩！使唔使呀！要成$888一個呀！唔怪得包得咁靚啦！你估有無人買呀啦！

沙田親子樂

秋高氣爽，真的好有放假氣氛，人的心都特別好，不太熱，不太冷的天氣，給人一種愉快的心情。人活着真好，感受到神給人類美好的世界，人約愛地球多一點，關心氣候的變化，留心自己生活的細節，能節約能源，不將自己的愛好付加於地球身上，人會活在世上更長呀！地球亦會開心D。

昨天，崇拜後與子曦及老公到沙田玩耍，當然！沙田都有好多好大的商場，但今天不是習中在行街，而是與子曦一定到沙田公園玩，他雖然帶着病，亦有點疲倦，晚上瞓着時都有D“Cut”還食緊藥，但去到公園，亦見有小朋友吹肥皂泡，他亦看着泡泡走來走去，還同泡泡講“give me five”，當時我聽到都感到好好笑，一定在學校學到啦！平時我們都有講，但他亦不會回應或自己講出來，返學原來真係學到好多嘢呀！

但頭先老師打來，話子曦有少少發燒呀！99.5度呀！要快d回家同他看醫生啦！唔知係咪昨天玩得開心得過份咗少少，又冷又熱，咁就病重加深呢........

">子曦與肥皂泡give me five      第一次放上短片呀！好成功.......

☆英式有機葵花子朱古力曲奇☆

☆英式有機葵花子朱古力曲奇☆

上回講到☆英式有機腂果燕麥曲奇☆及☆有機豆漿☆，還未發報的☆英式有機葵花子朱古力曲奇☆今日終放發報了，這款口味對朱古力愛好者來講，真的食個不停呀！

溫馨提示：

1.      如果用义壓平些，令到厚度相約，焙出來就會平衡些，免薄的邊會焙焦了。

2.      如果想香脆一點，焙完後可仍然放在焙爐中10分鐘，用餘有爐溫再焙一焙。

3.      放涼後快放入密實樽內保持脆口。

25塊份量

材料：

無鹽牛油           100g

有機砂糖           65g

蛋                       一隻

低筋麵粉           70g

朱古力粉           30g

有機全麥粉       90g

泡打粉               1/4茶匙

梳打粉               1/4茶匙

朱古力粒           80g(可入爐)

葵花子                30g(sun flower)

步驟：

1.     蛋及牛油回復室溫；低筋麵粉、朱古力粉、有機麥粉、泡打粉及梳打粉混合過篩。

2.     牛油加砂糖打至發白；

3.     蛋分3次加入，一路加入一路拌勻；

4.     篩入粉類用膠刮刀輕輕拌勻。

5.     加入朱古力粒及葵花子拌勻。

6.     用茶匙分成小份，及用义壓平。

7.     入預熱焗爐180度，15-20分鐘。